CCXXV.

1351, November 9. Breslau.

Herzog Nicolaus von Schlesien und Münsterberg verkauft die Stadt Frankenstein mit dem Distrikte des Klosters Kamenz an Karl IV.

Nos Nicolaus dei gratia dux Slesie dominus Munsterbergensis, notum facimus universis in perpetuum, quod animo deliberato et fidelium nostrorum maturo accedente consilio, considerantes in hoc utilitatem nostram, et prospicientes exinde nostram conditionem fieri meliorem, serenissimo ac invictissimo principi et domino, domino Karolo, Romanorum semper augusto et Boemie regi, domino nostro gratioso, pro se et suis heredibus ac successoribus regibus Boemie et eiusdem regni corona ementi et recipienti civitatem nostram Frankenstein, cum districtu monasterii Kamentz, talia a nostro ducatu separantes, et omnino disiungentes, vasallis, vasallagiis, feudis, feudatariis, militibus, clientibus, scultetis, civibus rusticis; emphiteotis et ad glebam astrictis agricolis et censitis, supremis et inferioribus iudiciis, iudicatibus, redditibus, censibus, proventibus, obventionibus, emolumentis, iure patronatus ecclesiarum, quod extra venditionis contractum cum universitate transire decernimus, montibus, vallis, planis, sylvis, rubetis, virgultis, venationibus, aucupationibus, aquis et aquarum decursibus, molendinis, lacubus, piscinis, stagnis, paludibus, piscaturis, cum omnibus iuribus, iuris­dictionibus, dominiis, libertatibus, honoribus, honorationibus, utilitatibus et obventionibus, que in, sub et super terram hactenus habita et inventa sunt, haberi seu inveniri poterunt in futurum, quo­quomodo, quibus etiam specialibus nominibus et vocabulis valeant designari, pro nobis, heredibus et successoribus nostris, utriusque sexus rite et rationabiliter ac iusto venditionis titulo, vendi­dimus, dedimus et resignavimus et presentibus resignamus, pro sex milibus marcarum grossorum Pragensium, Polonici numeri, quadraginta octo grossis pro marcha qualibet computatis, quas nobis solutas, datas et numeratas protestamur et dicimus, et in usus nostros utiles et bene­placitos applicatas, universos et singulos milites, clientes, scultetos, cives et quosque inhabitatores civitatis, districtus et territorii Frankensteinensis ab omnibus homagiis, iuramentis, promissis federibus et aliis quibuscunque respectibus, quos et que ad nos velut principem et dominum suum hactenus habuisse noscuntur, et habere debebant, de bona voluntate et certa nostre scientia pro nobis, heredibus et successoribus nostris predictis, absolventes ipsos, et eorum quemlibet heredes et successores eorum et prefatos dominum nostrum regem, heredes et successores ipsius reges Boemie et eiusdem regni coronam imperpetuum remittentes; ita videlicet, quod ad prefatum dominum nostrum regem, heredes et successores ipius reges Boemie et ad ipsius regni coronam imperpetuum, tanquam ad verum ordinarium et naturale dominium, veros ordinarios, seu naturales dominos, respectum habere debeant, ipsisque in omnibus fideliter obedire, renunciantes expresse pro nobis, heredibus et successoribus nostris predictis, omni iuri, iuris actioni, titulo, impetitioni, repetitioni, exceptioni doli mali et in factum actioni, legi, si convenerit, et exceptioni non solute, non numerate seu date pecunie, non boni seu legalis argenti, et aliis omnibus canonum et legum auxiliis sub quacunque forma verborum expressa sint, etiam si de his, vel eorum altera iure vel consuetudine deberet in presentia fieri mentio specialis. In cuius rei testimonium et robur perpetuo valiturum, presentes fieri et nostri sigilli munimine roborari voluimus, et pro firmioris cautele presidio, ut videlicet prefato domino regi, heredibus et successoribus suis regibus et corone regni prefati habundantius caveatur, illustres et magnificos principes ac dominos Bolkonem Swidniczensem, Cunradum Olsniczensem, Ladizlaum Teschinensem, duces, patruos et consanguineos nostros, nec non spectabilem dominum Mathiam, comitem de Trentsch, fratrem nostrum dilectum attente rogavimus, ut testes sint et velint existere omnium premissorum, sicut etiam ipsi ad nostre supplicationis instantiam, testimonium perhibent de premissis. Datum Wratizlavie anno domini millesimo trecentesimo quinquagesimo primo, feria quarta proxima ante festum beati Martini episcopi.

Or. Perg. im geh. Staatsarchive zu Wien. An Pergamentstreifen das Reitersiegel des Herzogs.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.